(Local) Tue, 21 May, 2019

జూన్‌ 1, 2 తేదీల్లో కేరళ తీరాన్ని తాకనున్న రుతుపవనాలు

May 14, 2019,   12:51 PM IST
Share on:

ఎండలతో అల్లాడుతోన్న ప్రజలు, రైతులకు శుభవార్త. ఈ ఏడాది నైరుతి రుతుపవనాలు సకాలంలో తెలుగు రాష్ట్రాల్లోకి ప్రవేశించే అవకాశం ఉందని ఏయూ వాతావరణ విభాగం రిటైర్డ్ ప్రొఫెసర్ భానుకుమార్ తెలిపారు. రుతపవనాలకు అనుకూల వాతావరణం ఉందని, జూన్‌ 1, 2 తేదీల్లో కేరళ తీరాన్ని తాకొచ్చని అంచనా వేస్తున్నట్టు ఆయన తెలియజేశారు. కేరళను తాకిన వారం పది రోజుల్లో అంటే జూన్‌ 10, 12తేదీల్లోగా రాయలసీమ, తెలంగాణ సరిహద్దుల్లోకి ప్రవేశించే అవకాశాలున్నాయని ఆయన ప్రొఫెసర్ భానుకుమార్ వెల్లడించారు. 

దక్షిణ భారతదేశం వైపు నైరుతి రుతుపవనాల గమనాన్ని డిసెంబరు నుంచి మార్చి 15 మధ్య యూరప్‌, ఆసియా ఖండాల్లోని దేశాల్లో కురిసే మంచు ఆధారంగా అంచనా వేయొచ్చని ఆయన వివరించారు. ఆ ప్రదేశాల్లో మంచు ఎక్కువగా కురిస్తే రుతుపవనాల గమనం మందగిస్తుందని, అదే సాధారణ స్థాయిలో ఉంటే చురుకుగా కదులుతాయని అన్నారు. ఈసారి అక్కడ మంచు సాధారణ స్థాయిలోనే కురిసినందున అనుకున్న సమయానికే రుతుపవనాలు దేశంలోకి ప్రవేశించొచ్చని పేర్కొన్నారు. వాతావరణం మరింతగా అనుకూలిస్తే రెండు రోజులు ముందుగానే కేరళ తీరాన్ని తాకే అవకాశం ఉందని, ఈ గమనాన్ని మే 20లోపు మరోసారి అంచనా వేయాల్సి ఉంటుందని తెలిపారు. 

నైరుతి రుతుపవనాల రాక దక్షిణార్థగోళం నుంచి మొదలవుతుంది. అవి మే 15-20 తేదీల మధ్య శ్రీలంక పరిసరాల వరకు ప్రయాణించి, అక్కడ రెండుగా విడిపోతాయి. వీటిలో ఒకటి బంగాళాఖాతం మీదుగా అండమాన్‌ వైపు, మరొకటి అరేబియా సముద్రం మీదుగా కేరళ తీరాన్ని తాకుతాయి. ఈ రెండింటిలో బంగాళాఖాతంవైపు పయనించేది మే 15-20 తేదీల్లో మొదలవుతుంది. ఆ తర్వాత వారం, పది రోజుల్లో అరేబియా సముద్రం వైపు మరో పాయ వస్తుంది. ఇప్పటికింకా ఈ ప్రక్రియ మొదలు కాలేదని, ఈ వారంలో కదిలే అవకాశం ఉందని నిపుణులు అంటున్నారు. 

దక్షిణ భారతదేశంలో ఎల్‌నినో ప్రభావం కనిపించడంలేదు. దీన్నిబట్టి నైరుతి ఆగమనం సకాలంలో, అంతకంటే ముందుగానీ ఉంటుందని చెబుతున్నారు. గతేడాది నైరుతి, ఈశాన్య రుతుపవనాలు రెండు తెలుగురాష్ట్రాలను దెబ్బకొట్టాయి. ఇందుకు ఆ సమయంలో వచ్చిన తుఫాన్లే కారణం. ఈసారి ఆ పరిస్థితులు ఉండకపోవచ్చని అంచనా వేస్తున్నారు. 

సంబంధిత వార్తలు

Copyright 2018 - 2019 www.telugudaily24.com. All rights reserved.