ఉప ఎన్నికల్లో తృణమూల్ కాంగ్రెస్ ఘన విజయం

పశ్చిమ బెంగాల్ లో మూడు అసెంబ్లీ స్థానాలకు జరిగిన మూడు ఉప ఎన్నికల్లో సీఎం మమతా బెనర్జీ నేతృత్వంలోని తృణమూల్ కాంగ్రెస్ ఘన విజయం సాధించింది. కాలియాగంజ్‌లో టీఎంసీ అభ్యర్థి తపన్‌దేవ్ సిన్హా, బీజేపీ అభ్యర్థి కమల్ చంద్రశేఖర్‌పై 2,418 ఓట్ల మెజార్టీతో గెలిచారు. ఖరగ్‌పూర్ సర్దార్‌లోనూ టీఎంసీ అభ్యర్థి ప్రదీప్ సర్కార్, బీజేపీ అభ్యర్థి ప్రేమ్‌చంద్ర ఝూపై 20,788 ఓట్ల మెజార్టీతో విజయం సాధించారు. కరీంపూర్ అసెంబ్లీ స్థానాన్ని టీఎంసీ నిలబెట్టుకున్నది. ఇక్కడ పోటీ చేసిన ఆపార్టీ అభ్యర్థి బిమలేందు సిన్హా రాయ్, బీజేపీ అభ్యర్థి మజుందార్‌పై 23,910 ఓట్ల మెజార్టీ సాధించారు.

టీఎంసీ గెలుపుపై ఆపార్టీ అధ్యక్షురాలు, సీఎం మమతా బెనర్జీ హర్షం వ్యక్తంచేశారు. ఐక్యత, లౌకికవాదం విజయంగా దీనిని అభివర్ణించారు. ఎన్నార్సీకి వ్యతిరేకంగా ప్రజలు తీర్పు ఇచ్చారని, బీజేపీ పతనం ఆరంభమైందని తెలిపారు.కాగా, ఉత్తరాఖండ్‌లోని ఒక స్థానాన్ని బీజేపీ నిలుపుకున్నది. పిథోర్‌గడ్ బీజేపీ ఎమ్మెల్యే ప్రకాష్ పంత్ జూన్‌లో మరణించడంతో ఖాళీ అయిన ఈస్థానానికి సోమవారం ఉపఎన్నిక జరిగింది. బీజేపీ తరుఫున పోటీ చేసిన ఆయన భార్య చంద్రపంత్, కాంగ్రెస్‌అభ్యర్థి అంజు లుంతిపై 3,267 ఓట్ల మెజార్టీతో గెలుపొందారు.