వరుస విజయాల కోహ్లి సేన...

ప్రపంచ టెస్టు ఛాంపియన్‌షిప్ ప్రవేశపెట్టినప్పటి నుండి టెస్టులలో టీమిండియా వరుస విజయాలతో దూసుకెళుతోంది . జరిగిన ఏడు మ్యాచుల్లో కూడా విరాట్ కోహ్లి సేన ఏకపక్ష విజయాలు సాధించింది. ఇందులో చివరి నాలుగు టెస్టుల్లో అయితే ఏకంగా ఇన్నింగ్స్ తేడాతో జయకేతనం ఎగుర వేసింది. దీన్ని బట్టి ప్రపంచ క్రికెట్‌లో టీమిండియా విజయపరంపర ఏ స్థాయిలో సాగుతుందో ఊహించుకోవచ్చు. ప్రస్తుతం ప్రపంచ టెస్టు ఛాంపియన్‌షిప్‌లో భారత జట్టు ఏకంగా 360 పాయింట్లు సాధించి ఎవరికీ అందనంత ఎత్తులో నిలిచింది. మరో ఒకటి రెండు విజయాలు సాధిస్తే టీమిండియాకు ఫైనల్ బెర్త్ దాదాపు ఖాయమవుతోంది. ఇటీవల సొంత గడ్డపై జరిగిన ఐదు మ్యాచుల్లో కూడా భారత్ భారీ విజయాలు సొంతం చేసుకుంది. సౌతాఫ్రికా, బంగ్లాదేశ్‌లతో జరిగిన చివరి రెండు టెస్టుల్లోనూ భారత్ ఇన్నింగ్స్ తేడాతో జయభేరి మోగించింది.

అంతేగాక వరుసగా నాలుగు టెస్టుల్లో ఇన్నింగ్స్ విజయాలు సాధించిన తొలి జట్టుగా ప్రపంచ రికార్డును కూడా తన పేరిట లిఖించుకుంది. ఇక, చాలా మ్యాచులను టీమిండియా మూడు రోజుల్లోనే కైవసం చేసుకుంటోంది. బంగ్లాదేశ్‌తో జరిగిన చారిత్రక డేనైట్ టెస్టు మ్యాచ్‌లో అయితే రెండున్నర రోజుల లోపే విజయం సాధించింది. ఈ మ్యాచ్ ఫలితాన్ని బట్టి టెస్టుల్లో భారత ఏకచక్రాధిపత్యం ఎలా సాగుతుందో ఊహించవచ్చు. ఒకప్పుడూ ప్రపంచ క్రికెట్‌ను శాసించిన దక్షిణాఫ్రికాను కూడా టీమిండియా చిత్తు చిత్తుగా ఓడించింది .భారత్ జోరు ముందు సౌతాఫ్రికా జట్టు పూర్తిగా చతికిల పడి పోయింది. చివరి రెండు మ్యాచుల్లో ఇన్నింగ్స్ తేడాతో ఓడి పోవడం దీనికి నిదర్శనం.

ఇక, భారత జట్టు విజయాల్లో సమష్టి కృషి స్పష్టంగా కనిపిస్తోంది. ప్రతి సిరీస్‌లోనూ టీమిండియా ఆటగాళ్లు కలిసి కట్టుగా పోరాడుతున్నారు. సౌతాఫ్రికాతో జరిగిన టెస్టు సిరీస్‌లో ఓపెనర్లు మయాంక్ అగర్వాల్, రోహిత్ శర్మలు ఆకాశమే హద్దుగా చెలరేగి పోయారు. ఇద్దరు వరుస సెంచరీలతో హోరెత్తించారు. ఇక, కెప్టెన్ విరాట్ కోహ్లి కూడా పరుగుల వరద పారించాడు. సీనియర్లు అజింక్య రహానె, చటేశ్వర్ పుజారాలు కూడా తమ బ్యాట్‌కు పని చెప్పారు. కీలక సమయంలో ఇద్దరు భారీ స్కోర్లతో జట్టుకు అండగా నిలిచారు. మయాంక్ అగర్వాల్, రోహిత్‌ల రూపంలో భారత్‌కు  ఓపెనర్లు దొరికారు. ఇద్దరు రెండు సిరీస్‌లలో కూడా సత్తా చాటారు. ఇప్పటికే వన్డే, ట్వంటీ20 ఫార్మాట్‌లో విధ్వంసక ఓపెనర్‌గా పేరు తెచ్చుకున్న రోహిత్ టెస్టుల్లోనూ అదే సంప్రదాయాన్ని కొనసాగిస్తున్నాడు. రోహిత్ విజృంభణతో భారత్‌కు ఎదురే లేకుండా పోతోంది.

బౌలింగ్‌లో కూడా టీమిండియాకు ఎదురే లేదు. ఇటు స్పిన్నర్లు, అటు ఫాస్ట్ బౌలర్లు అద్భుతంగా రాణిస్తున్నారు. సౌతాఫ్రికా సిరీస్‌లో స్పిన్నర్లతో పాటు ఫాస్ట్ బౌలర్లు కూడా మెరుగైన ప్రదర్శనతో ఆకట్టుకున్నారు. రవిచంద్రన్ అశ్విన్ మరోసారి జట్టుకు ప్రధాన అస్త్రంగా నిలిచాడు. రవీంద్ర జడేజా కూడా కీలక సమయంలో వికెట్లు తీస్తూ తనవంతు పాత్ర పోషించాడు. ప్రపంచంలోనే అత్యంత విజయవంతమైన స్పిన్ జోడీగా జడేజా, అశ్విన్‌లు పేరు తెచ్చుకున్నారు. దక్షిణాఫ్రికాపై వీరిద్దరూ అద్భుత ప్రతిభను కనబరిచారు. తాజాగా బంగ్లాదేశ్‌తో జరిగిన తొలి టెస్టులో కూడా అశ్విన్ సత్తా చాటాడు. జడేజా కూడా ఆల్‌రౌండ్‌షోతో ఆకట్టుకున్నాడు. ఇక, ఫాస్ట్ బౌలింగ్‌లో కూడా భారత్ సత్తా చాటింది.

స్పీడ్‌స్టర్లు మహ్మద్ షమి, ఇషాంత్ శర్మ, ఉమేశ్ యాదవ్‌ల త్రయం  ఆకాశమే హద్దుగా చెలరేగి పోతున్నారు. తొలి టెస్టులో ఉమేశ్, షమిలు అద్భుతంగా రాణించారు. చివరి టెస్టులో ఉమేశ్, ఇషాంత్‌లు అసాధారణ రీతిలో చెలరేగి పోయారు. ఇషాంత్ రెండు ఇన్నింగ్స్‌లలోనూ విజృంభించాడు. తొలి ఇన్నింగ్స్‌లో ఐదు, రెండో ఇన్నింగ్స్‌లో నాలుగు వికెట్లు పడగొట్టాడు. ఇక, ఉమేశ్ రెండో ఇన్నింగ్స్‌లో ఐదు వికెట్లతో చెలరేగాడు. తొలి ఇన్నింగ్స్‌లో కూడా మూడు వికెట్లు తీశాడు. షమి కూడా కీలక వికెట్లతో తనవంతు పాత్ర పోషించాడు. ఇలా బ్యాటింగ్, బౌలింగ్ విభాగాల్లో సమతూకంగా మారిన భారత్ టెస్టుల్లో వరుస విజయాలతో ప్రత్యర్థులకు చుక్కలు చూపిస్తోంది. భవిష్యత్తులో కూడా టీమిండియా జోరు ఇలాగే సాగుతుందనడంలో సందేహం లేదు.