వెస్టిండీస్ తో డిసెంబర్ లో జరిగే టి20 సంజూ శాంసన్‌ ఎంపిక

యువ వికెట్‌కీపర్ బ్యాట్‌సమన్ సంజూ శాంసన్‌కు ఎట్టకేలకు టీమిండియా జట్టులో చోటు దక్కింది. వెస్టిండీస్ జట్టుతో డిసెంబర్ లో జరగనున్న టీ20 సిరీస్ కు సంజూ శాంసన్‌ను సెలక్టర్లు ఎంపిక చేశారు. సయ్యద్ ముస్తాక్ అలీ టీ20 ట్రోఫీలో ఢిల్లీ తరఫున ఆడుతున్న భారత స్టార్ ఆటగాడు, ఓపెనర్ శిఖర్ ధవన్ గాయపడ్డాడు. దీంతో ధవన్ స్థానంలో శాంసన్‌ను ఎంపిక చేశారు.ఇటీవల బంగ్లాదేశ్‌తో జరిగిన మూడు మ్యాచ్‌ల టి20 సిరీస్‌కు శాంసన్‌ను ఎంపిక చేసినా.. ఒక్క మ్యాచ్ లోనూ అవకాశం ఇవ్వలేదు. అతడిని కేవలం బెంచ్ కే పరిమితం చేశారు. ఇక, విండీస్ జట్టుతో జరగనున్న టీ20 సిరీస్ కు టీమిండియా జట్టును ప్రకటించిన సెలక్షన్ కమిటీ.. సంజూ శాంసన్‌ను పక్కనపెట్టారు. వెస్టిండీస్‌తో టి20 సిరీస్‌లోనూ సెలెక్టర్లు అతడిని 15 మంది సభ్యుల జాబితాలోకే చేర్చలేదు. దీంతో మాజీ క్రికెటర్లు, విశ్లేషకులు సెలెక్టర్లపై విమర్శలు చేయడం మొదలు పెట్టారు. టీమిండియా మాజీ క్రికెటర్ హర్భజన్ సింగ్ బిసిసిఐ సెలెక్షన్ కమిటీపై తీవ్రస్థాయిలో మండిపడ్డాడు. శాంసన్‌కు అవకాశమివ్వకుండానే జట్టునుంచి తొలగించడంపై విమర్శిస్తూ.. సెలెక్షన్ కమిటీ సభ్యులందరినీ మార్చి వేయాలని డిమాండ్ చేశాడు. శాంసన్ కు బ్యాటింగ్‌ ఇవ్వకుండా అతడి పరీక్షిస్తున్నారన్నాడు. బోర్డు అధ్యక్షుడు సౌరబ్ గంగూలి అవసరమైన చర్యలు తీసుకొని పటిష్ఠమైన వారిని నియమిస్తాడన్న ఆశాభావాన్ని భజ్జీ వ్యక్తం చేశాడు.