సీఎం కేసీఆర్ ఆర్టీసీపై కీలక నిర్ణయం

తెలంగాణ ముఖ్యమంత్రి కేసీఆర్ ఆర్టీసీపై కీలక నిర్ణయం తీసుకున్నారు. కార్మికులు అందరూ ఈ రోజు నుండి  డ్యూటీలో జాయిన్ కావాలని పిలుపు నిచ్చారు. ఎలాంటి డిమాండ్లు లేకుండా విధుల్లోకి తీసుకుంటున్నట్లు చెప్పారు. చార్జీలు పెంచుకునే అధికారాన్ని ఆర్టీసీకి ఇస్తూ కేసీఆర్ ఆదేశాలు జారీ చేశారు. ఆర్టీసీ బతకాలంటే చార్జీలు పెంచాలని చెప్పారు. టీఆర్ఎస్ వచ్చిన తర్వాత ప్రజల పొట్టను నింపాము కానీ ఎవరి పొట్టలు కొట్టలేదన్నారు. తెలంగాణలోనే ఆర్టీసీ కార్మికులకు ఎక్కువ జీతాలు ఇస్తున్నామని.. దేశంలో ఏరాష్ట్రం ఇవ్వట్లేదని తెలిపారు . 

సమ్మెకాలంలో ఆత్మహత్య చేసుకున్న కార్మికుల కుటుంబాలకు ఉద్యోగం కల్పిస్తామన్నారు. కుటుంబంలోని వారు ఏ ఉద్యోగానికి అర్హులో చూసి భద్రత కల్పిస్తామన్నారు. ఇప్పటికైనా కార్మికులు.. యూనియన్ లీడర్ల మాటలు నమ్మకుండా  ఉద్యోగం చేసుకోవాలన్నారు.గొప్ప ఆర్టీసీని తీర్చిదిద్దడానికి ఏవిధంగా చర్యలు తీసుకోవాలో.. వారం రోజుల తర్వాత ప్రతి డిపో నుంచి ఐదుగురు కార్మికులను పిలిచి తానే స్వయంగా మాట్లాడుతానన్నారు. అసంబద్ధమైన అనాలోచితమైన నిర్ణయాలతో కార్మికులను.. యూనియన్ లీడర్లు ఇబ్బంది పెట్టారని మండిపడ్డారు.

ఆర్టీసీకి తక్షణ సాయం కింద రూ.100 కోట్లు ఇస్తున్నామని ప్రకటించారు. ప్రతి కిలోమీటర్ కు 20 పైసలు చొప్పున చార్జీలు పెంచుకునేందుకు వీలు కల్పించారు. ఆర్టీసీ బతకాలంటే చార్జీల పెంపు తప్పడం లేదన్నారు. సోమవారం నుంచి చార్జీలు పెంచుకునేందుకు అనుమతి ఇచ్చారు. ప్రైవేట్ పర్మిట్లు కూడా ఆర్టీసీ వాళ్లకే ఇద్దమనుకుంటున్నట్లు చెప్పారు. సమ్మెకాలంలో సేవలందించిన తాత్కాలిక డ్రైవర్లు, కండక్టర్లకు సీఎం కేసీఆర్ కృతజ్ఞతలు తెలిపారు.